Los nuesos finxos son la XUNIDÁ, OFICIALIDÁ y AUTOGOVIERNU.
 Lluchamos pola xunidá de tolos territorios del País Llïonés, un país qu´anguañu ta axebráu en dous estáos ( Hespaña y Pertual ), en duas comunidaes autonomas ( Castiella y Llión y Galicia ) y en cuatru provincias ( Ourense, Llión, Zamora y Salamanca ).
Todas estas axebraciones son artificiales ya impuestas dende un despachu, a la escontra de la voluntá popular, que nun tien drechu nin a un simple referéndum.
El País Llïonés tien una identidá nacional bien definida, por eillo ye necesariu y util costruyir un espaciu politicu que aconceye a tolos llïoneses por egual. Un espaciu politicu que permita decidir llibremente el futuru d´esti pueblu, un pueblu maltratáu ya inoráu pola historia Hespañoliega dende cuantayá, que merez un poucu de respetu y xusticia.
Lluchamos pola oficialidá de la Llingua Llïonesa, la nuesa llingua. El Llïonés ta guei en grave pilligru de desapaecer de la faz de la tierra sinon entamamos a protexelu y fomentar el sou usu ente la población. Ye una inxusticia qu´Hespaña y Valladolí nun lu reconozcan nin tan sequiera comu Llingua, p´eillos solu ye castellanu mal faláu. Peru la rïalidá ye bien distinta. Sigun datos de la UNESCO, el Lliones ye una llingua que se caltien en menor o mayor midida na totaliedá de Llión y Zamora, amás de la comarca Trasmontana onde ya goza de proteición. UNESCO aconseya a las istituciones el sou fomentu nas escuelas pa que nun fine desapaeciendu, peru estas nun fain casu a conseyos. En vé d´eillu, fomentan llinguas ayenas comu ye´l casu del gallegu, el cualu se quier oficializar en comarcas llïonesas comu Senabria ou El Bierzu, nun intentu de frayar cona nuesa llingua.
Por tóu eillu, Conceyu Xoven trabaya pa la sua oficialización .
 Lluchamos pol autogoviernu del País Llïonés. Tenemos el drechu a decidir el nuesu estatus políticu, el drechu a autoxestionare los nuesos recursos naturales, enerxeticos y culturales, el nuesu drechu, comu cualquier pueblu del mundu, a desendolcanos comu pueblu y non comu colonia, que ye lu que quieren facer con nós. Debíu a la falta d´autogoviernu, el País Llïonés escaez millones d´euros al añu que se van pa provincias comu Valladolí. La carencia d´ industrias nel nuesu territoriu ye debíu fundamentalmente a la falta de infrastructuras ya inversiones nos nuesos polígonos industriales. L´augua de los embalses Llïoneses, en vé de regar el paramu, va regar los secos campos pucelanos y palentinos, ensin que Llión reciba nada a cambéu. La provincia Llïonesa ye la que más centrales térmicas tien de tol estáu ( Compostiella, Anllares y La Robla ) y amás de nun recibir una compensación económica, la enerxia producida en Llión ye “robada” pola Xunta de Valladolí.
El País Llïonés ye´l territorio que mas xovenes perdióu na decada los noventa en tol estáu. Ensin Autogoviernu, el País Llïonés muerre.
Finxos rexonales del comité de Ribas del Sil
• Plan de dinamización turística
• Retirada de las escombreiras d´antracita
• Llimpieza y Saneamiento del Riu Sil
• Entamu de Cursos de Llingua Llionesa
• Recuperación de la Cultura tradicional
• Recuperación de la memoria histórica
• Entamu d´un plan de mocedá |
