Conflitu mineiru, una fuelga con más avisos que sorpresas.
La situación pola qu’atraviesa la minería llïonesa nun ye nueva, esta decadencia qu’acarrea ye frutu d’una mala xestión alministrativa por parte del goviernu autonómicu y central, asina comu una permisividá por parte de deillos empresarios fain que’l seutor mineiru tea nún puntu nel que poucos ven una lluz al final del camín.
Dende Ponferrada siempres viouse la minería comu’l futuru de la xuventú que “nun valía pa estudiar” que “ye vaga” peru agora, col supuestu Plan del Carbón que nos ufierta’l señor Zapatero, asina comu las supuestas ayudas que servían pa xenerar industria y autividaes empresariales alternativas pa las minas l’únicu que nos queda a los xovenes bercianos, montañeses, l.lacianiegos y en definitiva, tolos xóvenes llïoneses ye emigrare.
Un Plan del Carbón que carez d’alternativas necesarias pa los mineiros autuales, prexuvilaciones, vixilancia pa las empresas, la produción y sobru tou, las recolocaciones llaborales que dempués del peche de las minas se debería facer.
Unas minas que van ser esqueicías polas nuevas xeneraciones de llïoneses, peru que yá tan esqueicías agora pol goviernu al dar tan pésima alternativa a la industria que durante sieglos diera de comer a una gran parte del pueblu llïonés.
Tou estu nun ye culpa del Plan del Carbón, sinon de la pouca inversión p’hacia minas d’interior y el gran avance de las esplotaciones a cielu abiertu, que nun solu nun xeneran tantos puestos de trabayu comu s’espera, sinon que fuliminan el sou arrodiu natural, y siendu un metodu más baratu pal goviernu y de más ganancia pal empresariu.
Unos empresarios especuladores, que xuegan conas sovenciones ufiertadas pola UE pa pechar las minas de Llión, echandu a los sous trabajadores y que dempués de facer esu, mercan la mina d’al llau pa cobrar la sovención d’apertura, contratación de manu d’obra d’outros países, ye dicir más barata, y al cabu d’un tiempu, cuandu vean que nun dan tantas perras de produción, péchanlas y entamar outra vuelta’l procesu. Unos empresarios que train el carbón de países del Este d’Europa, conu que sal más baratu, peru que lu vende al mesmu preciu que’l d’esta tierra.
You nun séi de quien sedrá la culpa, si de la especulación empresarial esistente ou de la permisividá d’un goviernu, que sabiendu lu que fain los empresarios permíntelu y sofitanlu dandu-y perras a él y non al trabayor, que a la fin, ye’l que tien que comer tolos días, mantener a la sua familia y salir p’alantre conas enfermedaes y acidentes que pudiera sufrir na mina.
Por esu, dende esti artículu, el mieu sofitu y el de tolos llïoneses al mineiru, al gran esqueicíu nesti conflitu y al que tachan de radical solu por defender lu sou y lu de los sous.
PUXA LA MINERÍA LLÏONESA – PUXA'L MINEIRU LLÏONÉS
