¿Garantía na enseñanza pública?

A raigañu de las cabeiras nuevas sobru las causas de la Llei de Calidá de la Enseñanza (LOCE) prestariame, ya que teu la oportunidá, camentar unas cosuas.

Alderícase enforma sobru la viabilidá d'esti proyeutu na llexislación autual del Estáu hespañol, yá qu'una de las cousas que más prometióu'l PSOE fou'l derogar esta llei que nos va a tocar nos proximos años. Que si la obligatoriedá de la rellixón, que si seleutividá, que si talu, que si cualu. Peru agora bien, ¿que garantía tenemos los xóvenes llïoneses de poder estudiar la nuesa cultura?, la rempuesta ye cenciella, nenguna.

Dende que se cedienon las competencias a la Xunta de Castiella y Llión, en cuestión d'educación, solu estúdiase nos llibros de textu la hestoria de Castiella y Llión, una hipotética hestoria que supuestamente entamara yá col reinu castiellán-llïonés. Nos llibros que you lleí d'hestoria nun se fala de lu que fou'l Reinu de Llión nin naida vinculáu cola nuesa diferencia cultural conos d'Ávila ou Segovia. Ye tal l'intentu de negar la nuesa hestoria, que dicen que'l Reinu de Castiella y Llión entamóu nel s.XI y tolos reis llïoneses que tuvimos yá yeran de Castiella y Llión. Un conceptu de reinu / rexón / comunidá xunida que nun se tien nin agora.

Nun solu nel llibru d'Hestoria proporcionáu pola Xunta apaecen estas babayadas, sinon que nel llibru de llingua castiellana, niegase cualisquier existencia de la nuesa llingua, peru llega a tal mundiu que solu falta chamare paletos a los falantes de la llingua en tola sua extensión llingüistica. Tratanla comu un dialeutu que solu llega a fasteiras de la cá de caún porque la xente avergoñase de falala, cuandu nun ye que nos avergoñemos, sinon ye que nos humillan tantu que nos vemos obligáos a emplegar la diglosia más radical pa que nun se rian de nosoutros los tipicos "señoritos" de capital castiellana que falan correutu castiellan y que nun pueden sentir un "pa" porque yá consideranlu un paletismu más de los llïoneses.

En conclusión, ¿Puede considerase dalgu comu calidá educativa, cuandu niega tóu tipu d'esistencia de la nuesa cultura y de la nuesa llingua?. You creigu que non, y anque yá protestamos, deberiamos protestar más polu que ye de nuesu y facer ver, que tenemos llingua y tenemos conocimientos de que fuimos dalgu diferente a lu qu'eillos quisienun dende antañu. Que la nuesa voz nun se calle, porque si nosoutros callamos nun van venire outros pa protestar por nos.