Castiga y León

Venden-nos la cumbre col presidente alemán, trayen-nos un conseyu de ministros, construyen-nos un centru comercial na capital, y agora entrugovos a toos ¿esu interesa?

La construción del centru comercial sube'l nivel de vida, d'alcuerdu, peru ¿amïyora dalgu la situación del País Llïonés?

Los llïoneses, por desgracia, conformamosnos con vere comu Zapateru noma Llión comu la sua tierra, paeceríame bien si entá fueralu y se prïocupara por eilla, peru nin si quiera fai esu.

Ta nidiu que la situación del País Llïonés amïyoraría en cuantu preocuparanse un poucu por él, construyendu carreteras, trayendu industrias, fomentandu nuevos proyeutos... peru de los goviernus socialiegos solu vienenme malas remembranzas, ente eillos, la firma d'un Estatutu d'una autonomía burda y falsa en cultura, que nos vendienun comu si fuera de nuesu, cuandu en rïalidá creyouse pa parar el movimientu nacionaliegu que "sufría" l'Estáu hespañol.

Paez mentira, siñores, que los llïoneses tiermosnos piedras al nuesu mesmu teitáu, cuandu resulta que los llïoneses que llegan llueñe na politica son los que mas frayan la nuesa tierra, alcordemonos sinon del siñor Martín Villa, ún de los que sofitanun Castiga-León y outros tantos.

Yá ye hora d'espertare d'esti pesadiellu, de vere lu que tienen outras Comunidaes Autónomas. Peru nun solu nosoutros nos queixamos, sinon qu'outras provincias d'esta autonomía comu Soria tan comu nosoutros, y solu debese a una cousa, a la INCOMPETENCIA d'esta autonomía, y estu iguaríase cuandu deixe d'esistire esta aberración, tamien nomada Castilla y León.

Adrianu Garrido
(Carta espublizada na Edición Dixital al Diario de León)