Xunu y 30

Un añu más Conceyu Xoven amosóu na feria llïonesa del asociacionismu xuvenil sere la organización que cunta con más puxu ente la mocedá del nuesu país y que miyor sabe defendere los finxos ya inquietudes de la xente nueva.

El material ufiertáu pula nuesa organización quedóu curtiu ante la gran demanda de los llïoneses que masivamente visitonun el nuesu stand, pudiendu facese cun folletos, bandeiras del país, pegadiellas, carteles, cartafueyos, bolígrafos, etc, y que nun dubionun en trasmitire la sua allegría pul llabor que dende van bien d'años Conceyu Xoven vien desenrollandu pul nuesu pueblu al traviés de tres finxos bien nidios:

XUNIDÁ, OUFICIALIDÁ, AUTOGOVIERNU.

Xunu y 21

Cumu vien siendu yá tradicional nas Fiestas de San Xuan y San Pedru, una vuelta más la nuesa organización tará presente na Feria del Asociacionismu ExpoXoven p'averare cun puxu los nuesos finxos de Xunidá, Ouficialidá y Autogoviernu a la mocedá llïonesa.

La ExpoXoven cellebraráse na feria d'esposiciones del estadiu Antonio Amilivia durante los días Xunu y 21, 22, 23, 24, 25 y 26 n'horariu de 18,30 a 21,30 salvu los días 21, 22 y 24 nos que tamién tará abierta n'horariu de 12,00 a 14,00. Nel nuesu stand alcontraréis información enforma sobru tolu qu'arrodia a Conceyu Xoven y las suas autividaes amás de bien de material llïonesista prestosu asgaya.

Asperámosvos.

Xunu y 20

Dientru de las I Xornadas Cultura Llïonesa y Deporte, que vien entamandu la Conceyería de Cultura Llïonesa nel Salón d'Autos del Palaciu Don Gutierre, esti prósimu Viérnes, Xunu y 20, a las 20,00 horas, rializaráse una conferencia a cargu del Direutor Xerente de Bodegas Vinos de Llión, Pablo Sanjosé Recio que tratará sobru: El Vinu na Provincia de Llión. Una apuesta de futuru.

Pablo Sanjosé Recio cursóu estudios na Escuela Profesional de Comerciu de Llión y ye Máster en Direición y Alministración d'Empresas. Dende van 39 años ye Direutor-Xerente de Bodegas Vinos de León (Vile, S.a.) y dende face 21 de Bodegas Señorío de Nava, S.A. Pertenez ou perteneciera a los Conseyos Reguladores Ribera del Duero y Vino Tierra de León. Anguañu tamién ye Presidente de la Federación Nacional del Comerciu Interior de Vinos y y Vicepresidente de la Comisión de Comerciu Esterior de la Cámara de Comerciu ya Industria de Llión.

Leonoticias

Xunu y 20

Ante un auditoriu chenu dafeichu y cuna pasión que tou bon periodista deportivu sabe trasmitir al qu’ascucha, Miguel Ángel Iglesias Martínez rïalizóu un maravillosu percorríu pula historia de la Peña el Tambor y la sua pasión pul deporte, principalmente fundamentáu nel Baloncesto León.

Cun una recopilación d’imáxenes y amestandu los datos aportaos cun deillas anéudotas y emocionantes momentos, el conferenciante repasóu añu a añu dende la sua fundación dica guei cúmu la Peña el Tambor anicióu los sous pasos cun tan sólu 4 componentes, un timbal, un tambor y una corneta, y pasóu ser ún de los cimeiros referentes un qu’a hinchadas deportivas se refier.

El divertíu y emotivu evento acabóu cuna retrasmisión de los últimos y emocionantes minutos que llevonun al Baloncesto León face años a l’ACB y nos que s’amosóu cúmu rïalmente la Peña fou’l sestu xugador qu’emburrióu al equipu de la nuesa ciudá a la élite del baloncesto español.

La Crónica
La Crónica (2)

Xunu y 19

El nuesu Secretariu Xeneral, Abel Pardo Fernández, ta acabante de dare nuncia pública ante los medios de comunicación de cumu una vuelta más, el Conseyeiru de Fomentu de la Junta, Antonio Silván, miente a los llïoneses y ye ún de los responsables cimeiros de la perda de pasaxeiros qu'a lu llargu l'ultimu añu sufriera'l nuesu aeropuertu.

Ante las engañosas declaraciones de Silván y la Junta de que la empresa de baixu coste Ryanair podría establecese en Llión prósimamente, Abel Pardo amosóu cun claridá la falsedá d'esa afirmación yá que guei esi puntu nun ta dientru de los planes de la compañía aerea.

El nuesu Secretariu afirmóu tamién que la perda de pasaxeiros ye una consecuencia llóxica ante las torgas que se tan poniendu al aeropuertu de Llión pa que pueda cuntare cun vuelos internacionales y asiñalóu que Llondres y Xermaña han ser dous de los destinos prioritarios yá que sobrutóu nel país xermán hai 3,5 millones de pasaxeiros que podrían viaxar dende Llión.

Leonoticias
La Crónica

Xunu y 19

Cuna mesa redonda, L’ensiñu de las artes en Llión. Presente y Futuru, cándase’l I Ciclu de Conferencias Reinu de Llión.  

Esti proyeutu, cuntóu cuna participación de los poetas Eloisa Otero y Víctor M. Díez, el nuesu galardonáu rïalizador, Juan Carlos Mostaza, l’arquiteutu Eloy Algorri, Luís Grau, Direutor del Museyu de Llión, el cunta cuentos, Manuel Ferrero, Julio Lago, Doutor en Ciencias Económicas, José Luís Alonso Ponga, Profesor d’Antropoloxía de la UVA, l’Editor y Escritor, José Antonio Martínez Reñones, Jesús Palmero, artista perteneciente al coleutivu Juárez & Palmero, el Direutor del Departamentu d’Arte y Esposiciones del ILC, Luís García y la Escuela d’Arte de Llión.

El compromisu de la Conceyería de Cultura Llïonesa pur facere frente a las necesidades de l’autual situación nel panorama cultural llïonés, diou cuenta viva del pasáu, del presente y de las espeutativas  futuras que conforman la nuesa riqueza patrimoñal, al traviés de las personas que dan vida a las diversas manifestaciones y que proyeutan los sous conteníos nel engrandecimientu de la nuesa cultura.

La Crónica

Xunu y 19

Dientru de las I Xornadas Cultura Llïoneas y Deporte que vien entamandu la Conceyeria de Cultura Llïonesa nel Salón d'Autos del Palaciu Don Gutierre, esti prósimu Xueves, Xunu y 19, a las 20,00 horas, rializaráse una conferencia a cargu del periodista Miguel Ángel Iglesias Martínez que tratará sobru: La Peña... Pasión pul Deporte.

Falare de la Peña ye facelu de los últimos trenta y ochu años de la historia del deporte llïonés... ye facelu de la historia de dous de los barrios más emblemáticos de la nuesa ciudá, San Martín y El Mercado... una historia escrita cun palabras cumu amistá,convivencia, xenerosidá y, sobrutóu... ¡pasión pul deporte!.

Programa de las I Xornadas Cultura Llïonesa y Deporte
La Crónica

Xunu y 18

Conceyu Xoven tuvu presente nel primer aconceyamientu del Conseyu de la Mocedá de Llión pa la renovación de los sous estatutos. N'esti aconceyamientu, la nuesa organización algamóu que la llingua y cultura del nuesu país tean bien presentes n'esti organu al traviés de tres propuestas yá aprebadas: La denomación ouficial billingue del Conseyu de la Mocedá cumu "Consejo de la Juventud de León · Conseyu de la Mocedá de Llión", l'usu de la llingua llïonesa siempres que seya posible n'esti organu y en tola documentación que'l mismu emita, y la defensa esplícita de la cultura, tradiciones y llingua llïonesas.

Una vuelta más la nuesa organización amuesa d'un xeitu bien nidiu'l sou oxetivu de puxare cun fuercia purque'l llïonesismu y los sous finxos sigan cuntandu cuna máxima presencia ente la mocedá llïonesa y tolos organos que la representan.

Xunu y 18

Ante un aforu completu, Ricardo Ferradal intervienu nas I Xornadas Cultura Llïonesa y Deporte que se vien desenrollandu nel Salón d'Autos Palaciu Don Gutierre, cun una conferencia sobru Cousas del Vieyu Llión.

Cun una documentación gráfica exhaustiva, Ferradal fizu un repasu xeneral del conxuntu d'edificios civiles que formonun parte del patrimoñu arquiteutónicu de la ciudá, herencia cultural deixada pur diferentes familias nobiliarias y que guei conforman el llegáu históricu común de tolos llïoneses. El conxuntu d'eigrexas, usos, vezos, gremios, confradías, fiestas, plazas, tabiernas, llugares d'espardimientu, ou ociu, etc., evoconun un percorríu costumista pur un vieyu Llión, non exentu d'añorancia, n'esti homenax a los nuesos antepasaos.

El ponente diou las gracias a la Conceyería de Cultura Llïonesa na personas del Conceyeiru, Abel Pardo Fernández, pula sua sensibilidá manifiesta y pul sou entusiasmu na difusión de tolos valores de cultura llïonesa.

Programa de las I Xornadas Cultura Llïonesa y Deporte

Xunu y 17

Dientru del I Ciclu de Conferencias Reinu de Llión, que vien entamandu la Conceyería de Cultura Llïonesa nel Salón d'Autos del Palaciu Don Gutierre, este próximo miércoles, Xunu y 18, a las 19,30 horas, rïalizaráse una mesa reonda que tratará sobru: L'ensiñu de las Artes en Llión.

La mesa redonda analizará'l presente, pasáu y futuru de la Escuela d'Arte, viendu la evolución que tuviera durante los 25 años d'esistencia. Los desemeyaos participantes darán una visión dende'l sou puntu de vista cumu profesores y ex alunos, analizandu la implicación de la escuela de la ciudá y el futuru del ensiñu artísticu en Castiella y Llión, cun especial incidencia nel casu de Llión y los sous nuevos estudios superiores de Caltenimientu y Restauración de Bienes Culturales.

Diario de León
Leonoticias
La Crónica
Peatóm

Xunu y 17

Na tarde d'ayeri nel Palaciu Don Gutierre, y ante un auditoriu chenu dafeichu, el Conceyeiru de Cultura Llïonesa Abel Pardo Fernández diou entamu a las I Xornadas Cultura Llïonesa y Deporte nas que cumu l'edil desplicóu se rïalizará un averamientu a la cultura que nos costitúi cumu pueblu desemeyáu y cumu non a la gran importancia que'l deporte tien dientru d'eilla. Darréu se procedéu a la emision del documental "Asina Falamos" nel que s'amosóu cumu pur tola nuesa provincia la llingua llïonesa sige teniendu vitalidá y continua siendu usada pur llïoneses de tolas edades na sua vida mas cotidiana. Na tarde de guei, a las 20,00 horas, sedrá Ricardo Ferradal Pérez quien na sua charla "Cousas del Vieyu Llión" retrocedera ata'l sieglu XVII, p'amosanos cumu yera entós la nuesa capital, en qué trabayaban las sufridas xentes d'aqueillos tiempos y cúmu se divertian dispués de las suas xeiras diarias.

Programa de las I Xornadas Cultura Llïonesa y Deporte
Leonoticias
La Crónica
La Crónica (2)

Xunu y 16

Entamadas pula Conceyería de Cultura Llïonesa del Conceyu de Llión, na xornada de guei escomienzan las I Xornadas Cultura Llïonesa y Deporte cunas que dende'l Palaciu Don Gutierre se rïalizará un averamientu al puxu ya importancia tantu de la nuesa cultura cumu de la tradición deportiva que dende cuantayá abelluga'l pueblu llïonés.

Los autos d'estas xornadas tarán basaos en cuatru conferencias que tratarán sobru deillas temas cumu son la llingua llïonesa, la ciudá de Llión, la pasión pul deporte ou la tradición vinícola de la nuesa tierra. Estas conferencias tendrán llugar na presente semana'l llunes, martes, xueves y vienres a las 20,00 horas nel Salón d'Autos del Palaciu Don Gutierre y la primeira correrá a cargu del Conceyeiru de Cultura Llïonesa, Educación y Nuevas Teunoloxías del Conceyu de Llión, Abel Pardo Fernández, na que tamién s'emitirá l'interesante documental sobru la llingua llïonesa "Asina Falamos" de la compañía Armonía Films.

Programa de las I Xornadas Cultura Llïonesa y Deporte
La Crónica
La Crónica (2)
Gente en León

Xunu y 12

Luís García agradecéu l’interés amosáu pula Conceyería de Cultura Llïonesa al programare dientru del I Ciclu de Conferencias Reinu de Llión un espaciu pa la escultura urbana en Llión.

La escultura pública escomienza na nuesa ciuda nos primeiros años del sieglu XX, siendo cómplice y testigu de los cambios políticos y sociales qu’asoceden tantu en Llión, cumu nel restu d’Hespaña. La incorporación de la estaya d’Arte na Facultá de Filosofía y Lletras, los encomiables esfuercios desenrollaos pur Javier Hernando y Carlos de la Varga, posibilitonun que la escultura seya parte fundamental en deillos espacios de la urbe.

Luís García fizu usu d’una autitú crítica al valorare determinadas oubras que carecen de tratamientu volumétricu, ou aqueillas que nun alcuentran un allugamientu definitivu, conviertiénduse en eternos penitentes pula ciudá. Anguañu nun existe una pieza de reconocencia internacional. Nun hai una escultura pública que tenga pesu a estaya nacional. Matizóu’l Direutor del Departamentu d’Esposiciones del ILC.

Leonoticias

Xunu y 9

Cul envís de garrar un nuevu rumbu y un mayor puxu y presencia ente la xuventú, el Conseyu de la Mocedá de Llión acaba decidire que renovará los sous estatutos. N'esta renovación, Conceyu Xoven tará presente, cúmu non, pa garantizare que los dreichos más fundamentales de la mocedá del nuesu país se veyan espeyaos na nueva redaición.

Conceyu Xoven lluchará ente outras cousas purque los tres finxos cimeiros de la nuesa idioloxía, Xunidá, Ouficialidá y Autogoviernu seyan parte de los puntos fundamentales nos que se sofite la nueva cadarma del Conseyu de la Mocedá.

Xunu y 9

Dientru del I Ciclu de Conferencias Reinu de Llión, que vien entamandu la Conceyería de Cultura Llïonesa nel Salón d’Autos del Palaciu Don Gutierre, esti prósimu miércoles, Xunu y 11, a las 19,30 horas, intervendrá Luis García quien tratará sobru: La Escultura Autual en Llión.

Planteyaráse un averamientu mui xeneral a la situación autual de la escultura pública en Llión, tomandu cumu puntu d’entamu un breve analís de la escultura nel espaciu urbanu planteyandu las desemeyadas posibilidaes y problemas. Darréu se planteyará  un analís de la situación de Llión dende los nicios del sieglu XX dica guei.

Diario de León
Leonoticias
La Crónica
Peatóm

Xunu y 5

Jesús Palmero, intervinu nel I Ciclu Reinu de Llión cuna conferencia: Trasfronteirizos. Un averamientu a las experiencias vidiugráficas surdidas dende Llión, dandu gracias a la Conceyería de Cultura Llïonesa pul sou firme apueste en pescanciare la cultura llïonesa dende una óutica autual y de futuru. Tras analizare los primeiros axustes europeos y americanos, asina cumu los comprendíos nel territorio nacional, el ponente punxu de manifiesta que la progresión na vidiu creyación de los artistas llïoneses ye asemeyada a la que se produz en cualisquier llugar. Un movimiento que s’aniciaba cun una sele evolución, peru que cul cambiu del mileñu entama un relevante despege, en parte pul apueste de los museyos pur esta oución artística. La conferencia de Palmero acabóu cun una estensa alderique cul numberosu públicu asistente.