|
Setiembre y 29
 El Conceyeiru d'Educación, Abel Pardo Fernández, diou nuncia guei de que la llingua llïonesa tará presente en tolos colexos de la ciudá tras la esperiencia pilotu rializada l'añu pasáu en dous centros educativos que superóu enforma las espeutativas asperadas de manu. L'edil llïonesista afirmóu que yá ta unviáu'l programa educativu a tolos colexos del municipiu, consistente non solu en llingua sinon tamién n'aspeutos llïoneses de base cultural cumu son l'agricultura, los animales, los Reis de Llión ou l'arquiteutura tradicional.
Amás, el conceyeiru apuntóu que'l feichu de que'l llïonés tea presente nas escuelas cumu autividá estraescolar nun tendrá dengún coste pal Conceyu de Llión yá que los cuatru monitores qu'impartirán clas son trabayadores municipales, toos eillos llicenciaos en maxisteriu y cun una fonda esperiencia nun qu'a encontu escolar se refier.
Abel Pardo tamién informóu de qu'esta autividá cumple cunos oxetivos del pautu UPL-PSOE, l'Estatutu de Castiella y Llión sobru la defensa del llïonés y de la UNESCO y la Declaración de Dreichos Llinguísticos sobru la promoción y espardimientu del llïonés al traviés de las istituciones públicas.
Leonoticias
Diario de León
La Crónica
León Digital
Terra
ABC
|
|
Setiembre y 29
 El pasáu sábadu, tuvu llugar el I Campionatu de Bandas de Gaitas del País Llïonés, entamáu pula Conceyería de Cultura Llïonesa, cul oxetivu d'afalare y caltenere los valores heredaos. Seis fonun las bandas que participonun n'esta primeira cita, representandu deillos paisaxes y soníos llïoneses, tandu'l Xuráu compuestu pur miembros de la Lliga Gallega de Bandas de Gaitas.
La Banda de Gaitas Ciudá de Llión ganóu'l primer premiu, consistente nun troféu y 1500 €. El segundu premiu fou otorgáu a la Banda de Gaitas Castro Bergidum de Ponferrada cun una dotación de 1000 € y troféu; y el tercer y últimu premiu, consistente en 500 € y troféu, fou pa Aires Mineros de Matarrosa del Sil. Concursonun tamién las bandas Mencía de Toural de los Vaos y Sartaina d'Astorga. En calidá de convidaos pechonun esti campionatu Lengalenga representandu a Tierras de Miranda, onde el llïonés comparte oficialidá cul pertués.
Leonoticias
Diario de León
La Crónica
Gente Digital
Cartel Oficial
Cuña Oficial de Radiu
Cuña Oficial de Radiu 2
|
|
Setiembre y 25
 Conceyu Xoven tuvu presente nel aconceyamientu de ayeri entamáu pul Conseyu de la Mocedá de Llión nel que s'afitonun las asociaciones pertenecientes al mismu y se fizu una primeira lleutura oficial de los nuevos estatutos que nel sigiente enxame sedrán votaos.
Na nueva reglamentación baixu la que se rixirá esti organismu, y tras la collaboración autiva de la nuesa organización na sua redaición, garantízase la denomación billingue del conceyu tantu en castellán cumu en llïonés, l'usu de la llingua llïonesa en tou casu que seya posible, y la defensa autiva de al cultura y tradiciones llïonesas.
|
|
Setiembre y 24
 El Conceyeiru de Cultura Llïonesa, el llïonesista Abel Pardo Fernández diou nuncia guei de que'l prósimu sábadu, setiembre y 27, a las 19:30 horas y entamáu pur dicha conceyería, cellebrarase na Plaza de la Catedral de Llión el I Campionatu de Bandas de Gaitas del País Llïonés nel que las bandas participantes fadrán una prestosa amuesa interpretandu deillas piezas d'una de las siñas d'identidá llïonesas más carauterísticas nu qu'a estaya musical se refier: La Gaita.
Las bandas participantes sedrán: Ciudá de Llión (Llión) · Castro Bergidum (Ponferrada) · Templarios del Oza (Toural de Merayu) · Aires mineros (Matarrosa del Sil) · Sartaina (Astorga) · Mencía (Toural de los Vaos) y Lengalenga (Miranda'l Douru).
Cartel Oficial
Cuña Oficial de Radiu
Cuña Oficial de Radiu 2
Leonoticias
Gente Digital
Diario de León
La Crónica
e-Bierzo
León7días
|
|
Setiembre y 22
 Durante esti pasáu fin de selmana Conceyu Xoven riailzóu cun ésitu na ciudá de Llión las suas xornadas de formación estratéxica na que s'afitonun las aiciónes de carauter llinguísticu que durante esti cursu políticu han desenrollase nel nuesu país.
A lu llargu los dous días de duración d'estas xornadas a las qu'asistienun responsables en materia llinguística de Conceyu Xoven, fízuse analís de la política n'esa estaya desenrollada durante l'ultimu añu y afitónunse las aiciones que la nuesa organización llevará a cabu nos prósimos meses acordias a la situación autual del nuesu país.
|
|
Setiembre y 21
 El diariu llïonés La Crónica espubliza guei una tribuna del nuesu Secretariu Xeneral, Abel Pardo Fernández, na que se fae un fondu analís sobru la integridá territorial del nuesu país y la istrumentalización que deillos partíos estatales faen d'eilla cara a los sous congresos, tentandu de desaniciare la voluntá llïonesista de los sous militantes cun carambelos en forma de colocaciones y cargos.
Integridad Territorial
|
|
Setiembre y 15
 Dende la Conceyería de Cultura Llïonesa y continuandu cuna campaña "Reinu de Llión · Descubri un País", rializaráse pal domingu, setiembre y 21, una escursión a Bregancia cul viniente plan de viax:
09:00 H. Salida dende Plaza de Guzmán. · 12:00 H. Chegada a Bregancia. · 12:30 H. Visita al Castiellu de Bregancia (Museyu militar, Torre del Homenax). · 13:30 H. Xanta. · 17:00 H. Tiempu llibre pa visitare la ciudá (Igrexa de Santa Mariya, Domus Municipalis, Catedral) · 19:00 H. Salida de Bregancia pa Llión. · 22:00 H. Chegada a Llión. Encamentamos a los participantes que lleven una fardela cun dalgu de comida y augua.
El costu del viax ye de 10 euros pa empadronaos en Llión y 20 pa los non empadronaos, los interesaos deben achegase a la Conceyería de Cultura Llïonesa, allugada nel Palaciu Don Gutierre (tlfnu. 987 344 370).
Reinu de Llión · Descubri un País
Leonoticias
Diario de León
La Crónica
|
|
Setiembre y 12
 Na tarde d'ayeri Conceyu Xoven tuvu presente una vuelta más nel aconceyamientu rializáu na sede del Conseyu de la Mocedá de Llión, nel que se continuóu la xeira d'inventariare la documentación, redautare los nuevos estatutos y acuriosar el llocal cara a la nueva dómina que ta a escomencipiare pa dicha entidá.
Nel aconceyamientu d'ayeri afitóuse tamién la riestra de documentos que las asociaciones pertenecientes a esti organismu ya interesadas n'él deben entregare p'asina poder autializare los datos esistentes y amiyorar el trabayu y los llabores de xestión del Conseyu de la Mocedá.
|
|
Setiembre y 10
 El nuesu Vicesecretariu de Coordinación y Xestión Interna Adrianu Martín, asistíu en nome de la nuesa organización al aconceyamientu qu'entamóu na tarde d'ayeri la Conceyería de Mocedá de la ciudá de Llión pa tratare los puntos nos que Conceyu Xoven podría collaborare nel programa d'ociu alternativu es.pabila.
N'esti aconceyamientu afitónunse las bases pa desenrrollar un llabor curiosu nel afán d'espardire los puntos d'autuación d'esta niciativa del centru de la ciudá a la periferia, tentandu de que cada vuelta seyan más los xóvenes que se beneficien d'esti programa creyáu p'amenorgar el consumu d'alcohol y drogas ente la mocedá.
|
|
Setiembre y 7
 El Diariu llïonés La Crónica, espubliza guei una tribuna del nuesu Secretariu Xeneral, Abel Pardo Fernández, na que se fae un fondu y claru analís de la situación autual del Consorciu del Aeropuertu, la empresa Lagunair, y las torgas qu'entrambos sufren impuestas pula Junta de Castiella y Llión y la sua deuda cul aeropuertu de Llión.
La crisis del Aeropuerto de León
|
|
Setiembre y 6
 Tras quedare n'evidencia'l nidiu boicot que dende la Junta de Castiella se ta faciendu al Aeropuertu de Llión cul únicu afán de pechalu, y ante la clara incompetencia del Conseyeiru de Fomentu, Antonio Silván, amecida cunas declaraciones del Alcalde de Valladolí Francisco Javier León de la Riva dispreciandu al pueblu llïonés, el nuesu Secretariu Xeneral Abel Pardo, fizu públicu'l comunicáu de prensa qu'espublizamos darréu pul sou interés.
Nota de Prensa d'Abel Pardo Fernández
Leonoticias
|
|
Setiembre y 5
 Dende la Conceyería de Cultura Llïonesa y continuandu cuna campaña "Reinu de Llión · Descubri un País", rializaráse pal domingu, setiembre y 14, una escursión a Zamora cul viniente plan de viax:
9:00 H. Salida dende la Plaza Guzman el Bueno · 10:45 H. Chegada a Zamora · 11:00 H. Visita al Museyu Etnográficu de Castiella y Llión · 13:30 H. Xanta · 14:30 H. Tiempu llibre · 16:00 H. Visita giada de tres horas a la Muralla (Portiellu de la Traición), Catedral (interior y museyu), Puerta l'Oubispu, Miradeiru'l Troncosu (Panorámica del Douru), Eigrexa e S. Ildefonsu, Eigrexa de la Madalena, Plaza de Viriatu y Plaza Mayor · 19:00 H. Salida de Zamora · 20:45 H. Chegada a Llión.
El costu del viax ye de 10 euros pa empadronaos en Llión y 20 pa los non empadronaos, los interesaos deben achegase a la Conceyería de Cultura Llïonesa, allugada nel Palaciu Don Gutierre (tlfnu. 987 344 370).
Reinu de Llión · Descubri un País
Leonoticias
|
|
Setiembre y 5
 Va bien de tiempu que dende Conceyu Xoven denunciáramos públicamente al traviés de deillas campañas el boicot que dende la Junta de Castiella y cun Antonio Silván cumu másimu responsable taba a facese al Aeropuertu de Llión. Guei los feichos una vuelta más dan la razón a la nuesa organización y son los trabayadores de la entidá y tolos llïoneses los que lu pagan.
La empresa Lagunair diou nuncia de que ante la falta de compromisu de la Junta, que ye incapaz de pasar de las palabras a los feichos y abonare la sua deuda, apresentará nos prósimos días un espediente de regulación d'empleyu qu'afeutará al 30% de los sous trabayadores. Esti feichu, asocedíu pula mor de la incompetencia del Conseyeiru de Fomentu Antonio Silván, ye la preba de que la riestra de promesas feichas de compromisu pa cun l'aeropuertu de Llión, vuelos internacionales, etc, nun fonun más que mentiras cul envís de mazcarare l'oxetivu rïal de la Junta: Dar puxu al Aeropuertu de Valladolí y desaniciare los nuesos.
Dende Conceyu Xoven queremos una vuelta más amosare la vergoña que supón comprebare cumu la Junta y los políticos llïoneses del PP serviles a eilla, mienten al nuesu país y faen tolu posible pur torgare cualisquier niciativa ou entidá que pueda afalar el sou desenrollu.
Declaraciones del nuesu Secretariu Xeneral, Abel Pardo Fernández
Leonoticias
|
|
Setiembre y 5
 Gracias a la ideya surdida del grupu llïonesista nel Conceyu de Llión, nel que s'alcuentra representada Conceyu Xoven na figura del nuesu Secretariu Xeneral y viceportavoz de dichu grupu, Abel Pardo, l'Estadiu Antonio Amilivia de la ciudá de Llión chamaráse dica n'adelantre "Reino de León".
Esta nueva ye senciellamente una amuesa más del nidiu compromisu de política llïonesista pa cun Llión qu'UPL vien desendolcandu dende que va un añu entrara a fomare parte del equipu de goviernu de la ciudá. Poru, dende Conceyu Xoven queremos surrayare y felicitar esti feichu, refugandu d'outra banda la oposición del Partido Popular que, sigiendu las disposiciones cunas que dende la Junta se tenta de desaniciar al nuesu pueblu, refugóu la niciativa cul envís de torgala.
La Crónica
La Crónica (2)
Leonoticias
Diario de León
El Norte de Castilla
ABC
El Mundo
El Mundo (2)
El Mundo (3)
|
|
Setiembre y 3
 El nuesu Secretariu Xeneral y Conceyeiru d'Educación nel Conceyu de Llión, Abel Pardo Fernández, diou nuncia guei a la prensa de que nel nuevu cursu 08/09 que ta a escomencipiare n'esti mes, la llingua llïonesa tará ufiertada cumu autividá estraescolar en tolos colexos de la ciudá de Llión.
Pardo surrayóu que la preba pilotu desendolcada a lu llargu del pasáu cursu nos colexos "Quevedo" y "Antonio Balbuena" fou un ésitu dafeichu, cun una participación d'alunos que superóu enforma las espeutativas asperadas de manu, poru, esti añu daráse outru pasu históricu nel procesu de normalización llinguística garantizandu que tolos escolines que lu quieran puedan deprender la llingua'l sou país.
La Crónica
Leonoticias
Leonoticias (2)
Leon Digital
|
|
