|
Avientu y 31
 La cellebración del III Día de la Llingua Llïonesa, entamada pula Conceyería de Cultura Llïonesa del Conceyu de Llión, a cargu del nuesu Secretariu Xeneral, Abel Pardo Fernández, fou un ésitu dafeichu nel que más de 400 internautas averaos a la defensa y normalización del nuesu idioma participonun.
A la inauguración d'esta xornada pur parte del conceyeiru de Cultura Llïonesa, Educación y nuevas teunoloxías, sigienun una mesa redonda destinada a empleyaos municipales na que s'afitonun las basas de trabayu nun que respeuta a la normalización de la llingua nel Conceyu de Llión, una charla del diseñador de páxinas web Xairu Llópez na que se falóu de la creyación de las mismas y la importancia del llïonés n'esi tarrén, una ponencia d'Adrianu Martín, presidente de l'Asociación Berciana en Defensa de la Llingua Llïonesa "El Toralín", que tratóu sobru'l procesu d'afitamientu de la llingua llïonesa nel campu l'asociacionismu, una charla-alderique a cargu d'Héctor Villazala , presidente de l'Asociación de la Llingua Llïonesa El Fueyu, analizanzu l'estáu del procesu d'ensiñu del nuesu idioma n'adultos y las suas posibles alternativas, y yá pa candar esta xornada, una ponencia d'Abel Pardo Fernández sobru l'estáu autual de la llingua nu que respeuta a la sua defensa y normalización dende las istituciones y los prósimos programas a desenrollare.
Cartel Oficial
PuntuLLI
Leonoticias
Diario de León
Asturnews
|
|
Avientu y 31
 Na nueche d'ayeri'l salón d'autos y esposiciones del Palaciu Don Gutierre chenóuse dafeichu pur sesta vuelta consecutiva pa recibir al grupu Dadajazz.
Cun un fuerte apueste pul jazz más clásicu y prestosu que fizu las delicias de tolos asistentes al conciertu, esti grupu traslladóu los asistentes a lu más profundu d'esta música gracias a esta niciativa de la Conceyería de Cultura Llïonesa ta amosandu la bona salú de la que goza na nuesa ciudá.
Cartel Oficial
Tríticu Informativu
La Crónica
Diario de León
|
|
Avientu y 30
 Con motivu de la cellebración del III Día de la Llingua Llïonesa entamáu pula Conceyeria de Cultura Llïonesa del Conceyu de Llión, a lu llargu de la tarde de guei desenrollaranse una riestra d'autividaes cumu charlas y alderiques al traviés d'Internet, las cualas tendrán cumu centru neurálxicu'l portal d'Internet WWW.PUNTULLI.ORG. Cuatru sedrán los alcuentros virtuales que tendrán llugar a lu llargu d'esta tarde al traviés de la rede messenger.
· 10:00 - Entamu a cargu del Conceyeiru d'Educación, Cultura Llïonesa y Nuevas Teunoloxías, Abel Pardo Fernández.
· 12:00 - Mesa Redona: El Llïonés na alministración llocal , sólu pa empleyaos del Conceyu de Llión.
· 16:00 - La Llingua Llïonesa y la costrución de páxinas web , a cargu de Xairu Llópez, diseñador de páxinas web en llingua llïonesa.
· 18:00 - La Llingua Llïonesa y l'asociacionismu , a cargu d'Adrianu Martín, presidente de l'Asociación Berciana en Defensa de la Llingua Llïonesa "El Toralín".
· 20:00 - L'ensiñu de la Llingua Llïonesa n'adultos , a cargu d'Héctor Villazala, presidente de l'Asociación de la Llingua Llïonesa "El Fueyu".
· 22:00 - Llingua Llïonesa guei: autualidá y programas de futuru , a cargu d'Abel Pardo Fernández, Conceyeiru d'Educación, Cultura y Nuevas Teunoloxías del Conceyu de Llión.
Pa participare n'estos alcuentros ye necesariu cuntare cul software MSN Messenger, que podéis decargare dende esti enllaz , darréu, na estaya de contautos, debéis agregare la direición e-mail puntulli@gmail.com y sedréis añedíos automáticamente a las charlas.
Cartel Oficial
PuntuLLI
Leonoticias
Diario de León
Periódico de León
|
|
Avientu y 30
 L’arribada de las nuevas teunoloxías supunxu pa las llinguas minorizadas, cumu la llïonesa, una doble oportunidá y un gran retu. D’una manu los falantes de llïoneses cuntaban cun nuevas ferramientas qu’afitaran la conocencia y l’espardimientu l’idioma. D’outru llau, la comunidá científica internacional, los internautas, podían averase a conocer esta llingua, a investigar el llïonés, a difundiré los sous trabayos y a facer de la llingua llïonesa una llingua presente nel contestu internacional.
La creyación de webs, la utilización de chats, l’unviu de correyos lletrónicos, las comunicaciones on-line son una amuesa na que la llingua llïonesa avanza tolos días gracias al llabor d’istituciones, de coleutivos, d’asociaciones y de particulares. Internet ye una fonte inagotable de posibilidaes pal idioma, y la llingua llïonesa, cualitativa y cuantitativamente, tien nas TICs una de las suas grandes bazas pal sieglu XXI.
El Conceyu de Llión, nel III Día de la Llingua Llïonesa, cul sofitu de cuarenta organizaciones, quier dedicar esta edición a a las TICs, a la sua importancia pal desenvolvimientu d’una llingua, a las posibilidaes de creyar en Llingua Llïonesa, de comunicar en Llingua Llïonesa, de llier en Llingua Llïonesa, peru también a las posibilidaes de falare, decompartire, d’adeprendere.
Las TICs nun son la basa de salvación del idioma, peru sí una ferramienta cuna que podemos avanzar en que’l Llïonés seya un poucu más la llingua de tolos llïoneses. Las TICs permítennos tener una llingua de creyación y de comunicación, una llingua presente na nuesa sociedá, una llingua abierta al mundo que debe ocupar el sou sitiu.
L’espíritu d’esti III Día de la Llingua Llïonesa ye más llingua, más educación, más nuevas teunoloxías, más usu, más conocencia. Ésti ye’l futuru pal nuesu idioma.
N’esi sen, y dende’l Conceyu de Llión, entamamos esti III Día de la Llingua Llïonesa nel que los intenautas, los falantes, aqueillos que quieran avease al nuesu idiomas, son los grandes protagonistas, y animámosvos a participar en tolas autividaes previstas pa daye, si cabe, una mayor presencia en tolas estayas de la sociedá a la llingua propia de los llïoneses.
Recibíi un saludu.
Abel Pardo Fernández
Conceyeiru d’Educación, Nuevas Teunoloxías y Cultura Llïonesa
CONCEYU DE LLIÓN
|
|
Avientu y 30
 Na nueche d'ayeri'l salón d'autos y esposiciones del Palaciu Don Gutierre chenóuse dafeichu pur quinta vuelta consecutiva pa recibir al grupu llïonés Jazz Standard Ltd.
Cun un fuerte apueste pul jazz más clásicu y prestosu que fizu las delicias de tolos asistentes a esti conciertu, Jazz Standard LTD trasmitíu a los tola esencia d'esti xeitu de música que gracias a esta niciativa de la Conceyería de Cultura Llïonesa ta amosandu la bona salú de la que goza na nuesa ciudá.
Guei tamién a las 20,00 horas sedrá'l grupu Dadajazz el que continúe cun esta riestra de conciertos que tan siendu un ésitu dafeichu ente la sociedá llïonesa amante del jazz.
Cartel Oficial
Tríticu Informativu
La Crónica
|
|
Avientu y 29
A lu llargu'l día de mañana y entamáu pula Conceyería de Cultura Llïonesa del Conceyu de Llión, a cargu del nuesu Secretariu Xeneral Abel Pardo Fernández, tendrá llugar la cellebración del III Día de la Llingua Llïonesa d'un xeitu bien especial.
Si ta más que nidiu que la presencia de la llingua llïonesa y el sou interés medraran fondamente a lu llargu de los últimos años, destacable ye sobru tou'l sou usu nel campu de las TIC's, poru, la cellebración d'esti III Día de la Llingua Llïonesa tará centráu precisamente n'esi tarrén.
Al traviés de la páxina web de l'asociación PuntuLLI informarase a la sociedá de la importancia de la creyación d'un domiñu propiu pal pueblu llïonés y durante la xornada llevaranse a cabu charlas y coloquios na rede acerca de gramática, ensiñu, dicionarios, etc.
Comunicáu de Prensa
Cartel Oficial
Leonoticias
Diario de León
Periódico León
La Crónica
|
|
Avientu y 29
 El nuesu Secretariu Xeneral, Abel Pardo Fernández, denuncióu guei al traviés d'una coluna d'opinión nel diariu llïonés La Crónica, cumu tovía anguañu algunos periódicos de la nuesa tierra permiten la palabra a presonaxes que nun dubian en llanciare mensaxes arcaicos y avergoñantes falandu acerca de culturas y llinguas que sigún la sua opinión son inferiores ou superiores qu'outras.
Racismo Lingüístico
La Crónica
|
|
Avientu y 28
 Los cientu cincuenta asistentes que chenonun na nueite d'ayeri'l salón d'autos del Palaciu Don Gutierre pudun esfrutare d'un de los grupos llïoneses cun más puxu nu qu'a estaya de Jazz se refier: Swing Combo.
Al traviés de la voz de la sua solista Rosario, y cun temas que calecienun la fría nueite llïonesa cumu 'Road 66', el grupu fizu las delicias de los asistentes qu'estouponun n'aplausos en deillas ocasiones ante la gran calidá tantu de músicos cumu de la vocalista.
El prósimu llunes, avientu y 29, Jazz Standard LTD continuará a las 20,00 horas el I Ciclu de Jazz "FEICHU EN LLIÓN" nel salón d'autos del Palaciu Don Gutierre.
Cartel Oficial
Tríticu Informativu
La Crónica
|
|
Avientu y 27
 Ante un públicu qu'una vuelta más chenóu dafeichu'l salón d'autos del Palaciu Don Gutierre y cun temas tan esenciales n'esti xeitu de música cumu son
‘Tenderly', ‘Black Orpheus', ‘A Night In Tunisia' ou ‘But Beautiful', el tríu Tri-Full-Jazz apresentóu la sua amuesa de jazz dedicada a los oyíos más seleutos, siendu interrumpíos davezu pulos aplausos d'un públicu al que supun trasmitire tola sua enerxía y calor dende l'escenariu.
Mañana sábadu, avientu y 27, el I Ciclu de Jazz "FEICHU EN LLIÓN" continuará cun autuación de Swing Combo a las 20,00 horas.
Cartel Oficial
Tríticu Informativu
Diario de León
La Crónica
|
|
Avientu y 23
 Minutos depuéis de las ochu la tarde, el grupu de Jazz Tres Gatos Swing xubíu al escenariu d'un salón d'autos y esposiciones del Palaciu Don Gutierre qu'una vuelta más quedóu piqueñu ante la caterma que s'aconchegara a esfrutare del segundu conciertu d'esti I Ciclu de Jazz "FEICHU EN LLIÓN".
Cun un fuerte apueste pul jazz más clásicu y prestosu que fizu las delicias de tolos asistentes a esti conciertu, Tres Gatos Swing trasmitíu a los tola esencia d'esti xeitu de música que gracias a esta niciativa de la Conceyería de Cultura Llïonesa ta amosandu la bona salú de la que goza na nuesa ciudá.
El prósimu conciertu sedrá'l del tríu Tri-Full-Jazz que tendrá llugar el vienres, avientu y 26, tamién a las 20,00 horas.
Cartel Oficial
Tríticu Informativu
Diario de León
La Crónica
|
|
Avientu y 23
 A las 20,05 horas y ante un auditoriu chenu dafeichu, el Conceyeiru de Cultura Llïonesa, Abel Pardo Fernández, inauguróu na nueche d'ayeri nel salón d'autos del Palaciu Don Gutierre'l I Ciclu de Jazz "FEICHU EN LLIÓN".
L'edil llïonesista insistíu en que la conceyería de cultura llïonesa siempres puxara pulas artes desenrolladas pur artistas llïoneses cumu se vien faciendu dica guei. Darréu, el Quinteto Cova Villegas escomencipióu'l sou conciertu faciendu una amuesa de lu que ye'l jazz más clásicu y puru remisturáu cun temas de la música tradicional hespañola y llïonesa, siendu interrumpíos davezu pulos aplausos del públicu. Guei, tamién a las 20,00 horas, sedrán Tres Gatos Swing los que xubirán al escenariu del Palaciu Don Gutierre continuandu cun esti ciclu.
Cartel Oficial
Tríticu Informativu
Diario de León
La Crónica
|
|
Avientu y 22
 El I Ciclu de Jazz "FEICHU EN LLIÓN" entamáu pula Conceyería de Cultura Llïonesa del Conceyu de Llión escomencipia guei cuna autuación del Quinteto Cova Villegas a las 20,00 horas nel Palaciu Don Gutierre.
El nome de Cova Villegas ta lligáu a la historia del Jazz llïonés. La cantante punxera la sua voz al serviciu de deillos proyeutos, ún de los cualos, el quintetu qu'eilla dirixe dende van bien d'años, permíteye venceyase al jazz contemporaniu, cun un especial énfasis nel exerciciu de la improvisación, inda cuandu la esencia del sou repertoriu tenga'l sou raigañu nos estándares norteamericanos ou las canciones populares llatinuamericanas.
Cartel Oficial
Tríticu Informativu
Diario de León
La Crónica
|
|
Avientu y 18
 El conceyeiru llïonesista Abel Pardo Fernandez, apresentóu guei'l I Ciclu de Jazz "Feichu en Llión" que durante la tarde-nueche de las datas nadaliegas, y entamáu pula Conceyería de Cultura Llïonesa cul envís de sofitare d'un xeitu bien curiosu a los músicos de la nuesa ciudá, tendrá llugar nel Salón d'Autos del Palaciu Don Gutierre.
Tolos conciertos sedrán a las 20,00 horas y las fechas y grupos correspondientes son: Avientu y 22 - Quinteto Cova Villegas, Avientu y 23 - Tres Gatos Swing, Avientu y 26 - Tri-Full-Jazz, Avientu y 27 - Swing Combo, Avientu y 29 - Jazz Standard Ltd, Avientu y 30 - Dadajazz, Xineiru y 2 - Doctor Bogarde, candandu'l ciclu'l Coleutivu Jazz'takí en Xineiru y 3.
Cartel Oficial
Tríticu Informativu
Leonoticias
La Crónica
Diario de León
El Mundo
E-Norte
Tomajazz
|
|
Avientu y 18
 El nuesu Secretariu Xeneral, Abel Pardo Fernández, diou nuncia a los medios de que ta ellaborandu un dossier cul qu'asoleyare las necesidáes y perfiles del tipu de vuelos que la sociedá llïonesa demanda.
Pardo destacóu que non sólu ye necesariu creyare llinias internacionales sinon tamién facelu a aeropuertos que puedan coneutar al cliente cun outros puntos del mundo, asiñalandu las conesiones Llión - Llondres, Llión - Xermaña ou Llión - Roma. Sigún l'edil llïonesista tamién debería estudiase anantare las llinias Llión - Palma de Mallorca y Llión - Málaga al restu del añu, yá que la ufierta de Air Nostrum ye de tan sólu dous vuelos selmanales n'agostu.
Leonoticias
Diario de León
|
|
Avientu y 17
 El prósimu vienres, avientu y 19, a las 20,00 horas, y entamáu pula Conceyería de Cultura Llïonesa, continúa nel Palaciu Don Gutierre'l ciclu d'esposiciones "Escultura nel Patiu'l Palaciu" cuna amuesa escultórica "Babia" de Carlos Cuenllas, la cuala durará ata Xineiru y 30 y podrá visitase tolos días llaborables de 9,00 a 21,00 h.
La riqueza patrimonial d'un pueblu afítase en deillos pilares. Pintura, escultura, arquiteutura, tïatru, música, llingua, son basas nas que s'amuesa la personalidá de los grupos humanos. Potenciare la cultura llïonesa, promovere la conocencia de lu que fumos, de lu que somos, y de lu que queremos sere ye un de los oxetivos más importantes que desenvolvemos dende la Conceyería de Cultura Llïonesa del Conceyu de Llión. Escultura nel Patiu'l Palaciu ye un pasu más n'esi camín. El camín de conocer el pasáu y proxeutalu p'hacia'l futuru. Un futuru individual, peru tamién coleutivu. Un futuru de Llión y pa Llión.
Invitación Oficial
Periódico de León
|
|
Avientu y 15
 El diariu llïonés La Crónica espubliza guei una tribuna del nuesu Secretariu Xeneral, Abel Pardo Fernández. N'eilla podremos comprebare cumu tras tolos ataques sufríos pul pueblu llïonés pur parte d'una alministración que se nos impunxu, agora sedremos outra vuelta los llïoneses los que tendremos qu'avalire cunos nuesos impuestos a la capital castellana ante la crisis, pesia qu'ésta ye mueitu más grave na nuesa tierra.
Dinero leonés para salvar Valladolid
|
|
Avientu y 5
 Cul envis d'afondare na conocencia de la nuesa cultura más tradicional ya histórica y entamaos pula Conceyeria de Cultura Llïonesa, esta selmana escomencipian los Cursos d'Hibiernu '08 cul cursu "Poder, Goviernu y Alministración nel Reinu de Llión. Sieglos XV-XIX", impartíu pul profesor d'historia contemporania de la Universida de Llión, Laureno Rubio.
La duración del cursu ye de 10 horas repartidas ente los días d'avientu, 10, 11, 15, 17 y 18, 2008 de 19,00 a 22,00 horas. Los interesaos n'acudir al mismu deben aconchegase al Palaciu Don Gutierre (tlfnu. 987 344 370) allugáu na plaza'l mismu nome.
El preciu del cursu ye de 20 euros pa empadronaos en Llión y 30 pa non empadronaos.
Cartel Oficial
Periódico de León
|
|
Avientu y 1
 Esti fin de selmana desenrollónunse las Xornadas d'Economía y Marketing de Conceyu Xoven na que participóu la direición nacional y los responsables d'esta estaya de la nuesa organización.
Durante los dous días de duración d'estas xornadas,
afitónunse las basas de trabayu cara'l prósimu añu 2009 y alcordónunse las llinias d'autuación en deillos aspeutos.
|
|
Avientu y 1
 El diariu llïonés La Crónica espubliza guei una tribuna del nuesu Secretariu Xeneral, Abel Pardo Fernández, na que 'sanaliza el status autual de la educación llïonesa na que la Junta nun supiera axeitase a la rialidá del nuesu pueblu, basandu'l sou modelu na falacia y la invención de nuevas identidaes.
Un modelo educativo leonés
|
|
